Carte Blanche 2013/06 von Hans Jürg Zingg, Hasle-Rüegsau

Gedichtauswahl aus der Sammlung ‹my wörtersack – hundert gedicht ir bärner umgangsschprach (spouken wörd)› typoskript, entstanden seit Mai 2011 
© 2013 by Hans Jürg Zingg  hjz@zinggs.net, www.zingg-satire.ch    

#

my wörtersack

my wörtersack isch nid us lyne läder lode 
es isch e schpiuzügsack us virtuellem tuech 
umschpannet hirni mage härz hut haar u hode 
das macht sy schönheit us u isch o grad sy fluech

dä wörtersack isch sicher nüt für ängi geischter
guudschtückli fingsch u haut o mänge grobe chnebu 
i ha uf d schprach glost üses bärndütsch isch my meischter 
di gueti sitte hocket da am chürzre hebu

dänk eifach dra we d wosch dä spiitsching bäg uftue 
di wörter gits di ghöre dir so guet wi mir 
i üser chopfhushautig sy si bschteck u gschir

du kennsch sen aui teeu nimmsch nid so gärn i ds muul 
u we du fingsch grad die idee syg bsunders kuul 
de lös der bändu hopp u lis u los mer zue

# 

ufgrisse 

i ha mer
der arsch ufgrisse
für no ne sitzplatz z ergattere
aber weisch
das hocke nächär 

#

nid duss

tinnitus
tinnitus
tinnitus
tinnitus
dinn nid duss
i ha ne dinn
u hätt ne lieber duss 

#

velologie ü55

nidsi
flitz i
obsi
gschnops i
geit’s graduus
de längt my pfuus

# 

abhocke

är chunnt scho bim ufsitze
i ds schwitze
vom ufhocke
chan er nume no troume
das cheibe umehocke
macht ne fertig
u gmüetlechs zämehocke
macht ne müed

so mues er warte
bis er sy zyt abghocket het
u äntlech
cha ga

# 

manne am rächner

si sitzen am rächner u schtudiere
d kurven uf em biudschirm
für öppis z eruiere
u müglechscht erfougrych z publiziere

si sitzen am rächner u schtudiere
d kurven uf em biudschirm
u telefoniere
für müglechscht erfougrych z inveschtiere

si hocke vor em rächner u schtudiere
d kurven uf em biudschirm
u maschturbiere 

# 

bassgygetanz

e bütti vou bschütti
e bütti vou bluet
derzwüsche drei blutti
bassgyge mit huet

si pyschte u pärze
bim heilige tanz
si ruure u pfuure
u lache sech e schranz

si schüttle iri püppi
si schlängge iri haar
da belüüchtet iri blütti
der mond wunderbar

u si bade ir bschütti
u si bade im bluet
un im bassgygegade
da schmöckt es nid guet